لو بعدت

لو بعدت

مين ينور شمعتى لو جه النسيم يوم عليها

لو قسيت

تقدر تمحى

دقة كانت مكتوبة ليها

يا ابنى افهم

البعاد مهوش قدر

البعاد قطعة حجر

منقوشة ف القلب الرقيق

مش هاتقدر عنى تبعد أو تغيب

قلبك يا غالى مش حجر

قلبك حنين مش رهيب

عمر الكلام اللى اترسم

عنو هاترجع لو تغيب

يفضل بينا شىء انكتب

واتشبكت فية الايد

لو جيت ف يوم وقسيت

ورسمت لوحة للوداع

تلقانى جيت

عندك هنا

وعلى اسم الوداع

خطيت

لا
اكيد هنبعد لاء

مش اكيد
اللى بينا شىء جميل ماينقتلش

اللى بينا

ميتخنقش

اللى بينا

ميتنسيش

لو فات عليه مليون سنة

هنبعد لاء

موال الخوف

الخوف جوايا زى السوس

بينخر فى الكيان ويدمره

والفرح لما يملى الصدر بيغيره

والضحك لما بيترسم ع الشفايف بيقتله

ليه يا خوف غيرتنى

توهتنى

مليت حياتى ببرد كبير بيهدنى

ليه ضيعت منى كل لحظة حلوة

وحيرتنى؟

خلتنى أخاف من خطوتى

من بسمتى

من همستى

من طلعتى

وانا اللى كنت لما بمشى بيتعرف

انا مين من صوت مشيتى

والجمال اللى سكنى

مكنش عمره بيتوصف

والناى يغنى لما يسمع صوت ضحكتى

خلتنى ليه بس النهاردة كدة حزينة

والبسمة تهرب م الشفايف

وتقولى يا مسكينة

والزهرة اللى من زمان زرعتها

ماتت من قلة ريهاااا

معدشى دمعى يبلها

حتى دموع عنية اتحجرت

يا خوف

يا خوف ملا الفؤاد وخلاه خراب

معدتش اسمع فيه غير صوت الغراب

والذكريات الحلوة

نزلت عليها اكوام تراب

والفرح ادام عنية

اصبح م الهموم دى سراب

معدشى يفرحنى ولا حتى قرب الاحباب

شفت يا خوف لايه وصلتنى

لبحر عاصف

وموجه قاسى بيشدنى

وانا فيه لوحدى

مفيهش ايد تتمد لى

ولا حضن دافى يضمنى

وحبايبى جنبى وبالف ايد بتزقنى

وبيرمونى ف وسط الخوف والمجهول

يرضيك يا خوف حالى كدة

معقول؟

انا هفضل عليك ساكتة

وصبرى عليك هيطول

ولحد اما ريشى يطول

ومنك اقدر اطير

هفضل اغنى واقول

فى صبرى عليك والخوف

مواويل

ومواويل

تكسب جولة

تكسب جولة
مش معنى انى اسلم مرة
ان دية نهاية الحرب
دور عنى راح تلاقينى
قوية وصلبة جسم وقلب
لسة المعركة هنا دايرة
ولنا فيها خبط وضرب
دى لسة اول جولة
ادامنا طريق كله مقاسى
تتعب فيه وتشوف وتقاسى
وراح اقولك من اول دلوقتى
نصرك ف الجولة دى شىء رائع
بس لكنه وقتى وضايع
مش معنى انك تضرب مرة
انك فارس عصرى ووقتى
مش معنى انى اسلم مرة
ان دية نهاية الحرب
دور عنى راح تلاقينى
قوية وصلبة جسم وقلب
وحقيقة ولازم تعرفها
انا لما عرفتك
قلت اتسلى
اهو حب ويقضى على جرحى
ويمكن يبقى ف لحظة حقيقة تعيش ف القلب
او حتى اما ازهق اسيبه
ويروح قلبى لحب وغيره
وقلت هاحاول
يمكن اقدر
من غير ما اغدر
وقلت لقلبى
جرب
حاول
يمكن تعرف تبقى مقاول
وتبنى ف حبك قصور وجداول
وتعلا
وتعلا
من غير م تسافر
لكن قلبى يا خسارة عليه
لسة الوفا موجود جواه
والحنية معجونة فية
وقال مش ممكن
يضرب وانت
ضهرك ليه
لكن انت وبكل قساوة
قمت ضربت
فية وفيه
بس بقولها وهفضل اقولها
مش معنى انى اسلم مرة
ان دية نهاية الحرب
دور عنى راح تلاقينى
قوية وصلبة جسم وقلب
لسة المعركة هنا دايرة
لنا فيها خبط وضرب
يمكن اكسب او نتعادل
او تهزمنى
واهى دى الحرب
لكن لسة من الجولات فاضل مية
نحاول فيها أد م نقدر
والشاطر من ف الاخر يقدر
يكسب كل الجولات

متمزع قلبي بدمى العربي

متهان منداس

تحت كل مداس

وعينى ع العربي

واقف محتاس

مش لاقى لقمة ولا لاقى فراش

مقطوعة عنه المية يا ناس

وحكامنا اهوم ولا ف الراس

خطب رنانة حفظوها

ف دماغ الناس بيرموها

وآهين يا خسارة

ناس مدهوسة

وانياب مغروسة

ف كل مكان

بتمزع ف الجسم العربي

ولا عاد لا عراق ولا حتى سودان

ولا قدس كمان

كله بقى تحت النيران

وعيني ع العربي

آة -- يا يهودي

يا يهودي سيبنا بقى ف حالنا

ما كفاية بينا اللي جرى لنا

نازلين تخبيط

وهد بيوت

وع الناس قاطعين

مية ونور

وحتى طعام

بالذمة يا ناس دا اسموا كلام

حتى المستشفى منعوها

وولادنا صغار

ع الغدر صغار

بأيدهم قاموا قتلوهم

وعن دواهم منعوهم

يا دنيا حرام

راح الإسلام

لو كل واحد قال يا حرام

ووقف متسمر يقول يا سلام

لو ينفع يعنى تسيبوهم

مين يمسك لقمة سهلة ف يوم

وبأ يدة كدة راح يرميها

دي بلادنا أمانة في أيدنا يا ناس

لازم بالقوة نحميها

والقدس اهية قصادنا يا ناس

فينك يا عمر تيجى تحميها

وبقوة سيفك تفديها

آة --يا بلد

يا بلد مسكونة بجن شيطان

بيمزع جسمى شمال ويمين

راح أجيب قرآن

واقف على الجان

واقري واحلف له بالرحمن

لاطهر أرضى من الشيطان

وارجع قدسى طاهرة نضيفة

اغلى الحبايب

بعيد عن الارض والبحر والشجر
بعيد عن الناس ويمكن فوق القمر
رسمتك يا حبيبى فارس ليل السهر
وليك انا بكتب موالى
عن الحب والقمر
انا ليك بعلن ودادى
انا ليك بعلن انى عشقت فيك السهر
وف عينيك حبايبى انا
دوبت من السفر
يا اللى انت اغلى الحبايب
وانت كل الحبايب
بعلن ليك واقولك فى حبك انا قلبى دايب

احلامى
احلامى مش كتيرة
------وبرضو مش كبيرة

احلامى زى سنى

صغيرة وجميلة

بحلم والحلم جانى

واحلو معاه زمانى

ورجع لى الفرح تانى

ما كنت اظن انى

بعد سنين التمنى

تضحك لى الدنيا تانى

احلامى مش كبيرة

وبرضو مش كتيرة

احلامى زى سنى صغيرة وجميلة

احلامى يا حتة منى

يا صغيرة وبريئة

محلمتش يوم بانى

سفيرة او أميرة

لكن بحلم بانى

فراشة ومش كبيرة

أجرى والعب كأني

مخلوقة ف الدنيا وحدي

طايرة والنور شاددني

وليه بجري واعدي

احلامى ياحتة منى

يا صغيرة وبريئة

بحلم والحلم جانى

ورجعت معاه الغناوى

وان كنت ع الهجر ناوى

انا هجرك مش هاممنى

هرجع لحلمى تانى

واعيش مع الغناوى

واحلامى البريئة

احلامى مش كبيرة

وبرضو مش كتيرة

احلامى زى سنى

صغيرة وجميلة

احلامى يا حتة منى

يا صورة فى لوحة وردى

برسم بريشة دهبى

لأجل ما تظهر مواهبي

برسم بريشة فضي

لاجل م نقدر نخطى

ونقول للحزن عدى

والفرح ما يستخبى

من احلامى البريئة

احلامى مش كبيرة

وبرضو مش كتيرة

احلامى زى سنى

صغيرة وجميلة

شايف يا صحبى

شايف نظرة الخوف

اللى جوة عنيك بلقيها

اللى جوة عنيك بتطوف

اللى ماسكة دفة سفينتك

واللى بتشدك للجوف

خليك يا صحبى قوى دانا

عمرى ماتمنيتك ضعيف-

دا بكرة دايما كنت بشوفة

جوة عنيك من غير كسوف

والامل فى عينيك بيقتل اى خوف

ايه اللى غير حالك؟؟؟؟؟؟؟؟؟؟؟

واللى خلاك تخاف؟؟؟؟؟؟

------------------

دانت يا صحبى اللى علمتنى اتحدى الظروف

وانت اللى قلت فى يوم

اللى يحب ميعرفش الخوف

وانت للى قلت انى

قلبى بالنور شفاف

وانت اللى قلت انك

فى عنية بتعرف تشوف

كل امان الوجود

كل ابتسامات الظروف

جى تقول بس النهاردة

ان الكلام دة كان تخاريف

وان ابتسامات الظروف ما هية الا لمع طيف

وان بكرة كنت شايفة

وهوة كلة خوف

وان الامان اللى فى ايديه

كان رعشة وارتجاف

لاء يا صحبى

مش ح صدق مش ح خاف

انا ف طريقى هفضل ماشية

مفيش محل للتراجع او الوقوف

انا اصلى شفت بكرة حقيقة

وعمرى ما شفته طيف

وف قلبى ايمان بالله وعمرى

ماآمن بتحكمات الظروف

اصل الايمان يا صحبى لما يتحكم

يبقى مفيش مكان للخوف

--------------------------------

اسمع يا صحبى نصيحتى وخليك اول الصفوف

وأد ما تقابلك مصايب

خليك اول من يتحدى الظروف

واوعى تقولى العرف

الحب عمرة ما بيعرف عروف

دا اللى يقول العرف

بيفضل دايمااااا

آخر الصفوف

ومهما تقوم الدنيا

عمره ما بيعرف وقوف

وان قست عليه الدنيااااااااايقول

:اهى دى الظروف

--------------------

ابعد يا صحبى دانا

عمرى ما عرفت الضعيف

دانا سكتى واضحة ومتينة

ومتعرفش الخوف

واصلى اتعودت دايماااااااااا

انى بقود الصفوف

واعبر فى سبيل النجاح

من المشاكل الوف

والوف

----------------

دانا ف قلبى يا صحبى حب

تعجز عن وصفه كل الحروف

دانا عشت ف السما عالية

انفى فوق كل الانوف

لا موجة تهزنى

ولا قلبى يعيش مخطوف

اصلى قوية يا صحبى

وبرفض اعيش فوق الرفوف

ولوجودى من الفوايد

ألوف وألوف

وانت يا صحبى

خليك قوى-

وقلبك خليه عطوف

تعيش بين الناس محمود

فوق الرؤس معروف

ينطق فؤادى بحبك

من غير اى كسوف

واقولها تانى

واسمع لكل حرف من الحروف

خليك يا صحبى قوى

امسح ظلال الخوف

خليك قوى